Во изминативе седум дена Скопје беше домаќин на Отвореното тениско првенство на Македонија, а титулата му припадна на Унгарецот, Мате Валкус.
По 23 години македонската престолнина повторно доби шанса да биде организатор на еден АТП Челинџер турнир и Скопје уште еднаш потврди дека може да организира турнири од највисок ранг.
Љубителите на тенисот можеа да уживаат во настапите на десетте најдобри млади тенисери во светот, но и играчи кои во текот на кариерата биле во врвот како што е Русинот, Евгениј Донској кој може да се пофали дека успеал да го совлада легендарниот Роџер Федерер.
На турнирот партиципираа и нашите најдобри тенисери Калин Ивановски, Берк Бугариќ, Обрад Марковски Горазд Србљак и Бесир Дургути.
Најдобриот резултат го постигнаа Ивановски и Бугариќ кои во игра на двојки стигнаа до четвртфиналето каде беа поразени од победниците на турнирот Петр Ноуза и Ендрју Полсон.
Од петти јуни Скопје ќе биде домаќин на ИТФ турнирот на кој повторно љубителите на тенисот ќе може да уживаат во квалитетни мечеви, а ќе можат да ги следат и настапите на најдобрите тенисери од Македонија.
ФОТО: Игор Паневски
