Грците утре ќе гласаат на парламентарни избори кои се сметаат за најнеизвесни во последната деценија. Главни политички ривали се конзервативниот актуелен премиер Кирјакос Мицотакис и поранешниот премиер, левичарот Алексис Ципрас.
Централниот слоган на владејачката Нова Демократија е „Стабилно, Храбро, Напред“, додека на опозициската СИРИЗА – „Правда за сите“.
Според истражувањата на јавното мислење во Грција, Нова Демократија е на првото место, втора е СИРИЗА, а трета Пасок – движење на промена, додека, пак, околу 10 отсто, односно еден од десет анкетирани сè уште не одлучиле за кого ќе гласаат.
Изборите в недела ќе се спроведат според пропорционалниот модел, што не предвидува бонус од 50 пратеници за партијата победник. Тоа значи дека ќе биде многу тешко да се формира еднопартиска влада, а доколку партиите не коалицираат, земјата ќе оди на втори избори на почетокот на јули.
