Ноќеска се огласија сирени за воздушни напади ширум Украина. Во некои делови се пријавени експлозии, но не и жртви. „Ројтерс“ пренесува дека не се забележани напади на инфраструктура или на цивилни цели.
Украинската војска соопшти дека руските авиони се активни и оти постои опасност од удари со хиперсонични ракети од типот „Кинџал“.
Шефот на воената администрација на Киев, Сергеј Попко изјави дека руските сили лансирале голем број на дронови кон украинската престолнина, но и дека украинските сили ги уништиле сите воздушни цели во десеттиот напад на главниот град од почетокот на месецот.
За разлика од него, портпаролот на украинските воздухопловни сили, Јуриј Игнат вели дека, сепак, сите цели не биле соборени.
„Уништени се три калибарски ракети кои беа лансирани од Црното Море и соборени се 16 дронови. Секојдневно продолжува гранатирањето. Не беа погодени сите мети“, изјави Игнат.