Усогласување со криминалот, а не со законите на ЕУ, за опозицијата е денешното експресно аминување на законите за „Бехтел и Енка“.
Најавија кривични пријави за кршење на процедурите, злоупотреба на европското знаменце и наметнување на спикерската воља над правото.
Против гласаше и Маја Морачанин од ДОМ, која исто така смета дека, овие измени предизвикуваат нееднаквост пред законот.
Пратениците реагираа и зошто на предложените измени не се потпишани министри, туку заменици, а на некои и воопшто нема потписи. Образложението зошто се продолжува работната недела, исто така го даде заменик.
Потребата за измени на законите беше изгласана со 62 гласа „за“. Двајца беа против, а опозицијата претходно ја напушти салата. Следи расправа во Комисијата за европски прашања, која за закони со европско знаменце трае два дена, без оглед на поднесениот број на амандмани.
Далиборка Демјанска
Мицкоски ќе упати писмо до Европската комисија за злоупотреба на еврoпското знаменце
ВМРО ДПМНЕ ќе упати писмо до Европската комисија, амбасадите и до сите институции за да предупреди дека со криминален тендер ќе почне изградбата на коридорите 8 и 10д и дека се работи за криминално трошење стотици милиони евра за аванси и пенали. Лидерот на партијата Мицкоски чека реакција од канцеларијата на Европската комисија и од амбасадорите на земјите членки на ЕУ и се сомнева дека тие се злоупотребени.