Два дена откако си заминаа сè уште нема официјална потврда со кого се сретнале. Кој ги повика и какви информации понеле во Вашингтон. Тимот за санкции на САД го наруши спокојот на извршната и судската власт, но никој не знае кој ќе се најде на црната листа на САД. Молчи премиерот, зборува претседателот кој испрати порака дека овие лица не се правници, ниту истражители, туку високи дипломати со експертиза кои нема да ни ја завршат работата во нашиот двор.
За време на престојот минатата недела, се информирале за сознанија за случаи на висока функционерска корупција, не само за оние завршени како конфискацијата на Мијалков и на Трансмет, туку и за активни предистраги против актуелни и поранешни функционери. Од амбасадата на САД не прецизираат други детали, но порачуваат дека секој висок функционер надвор од САД кој што ќе биде вмешан директно или индиректно во сериозни корупциски предмети или прекршување на човекови права, спаѓа во доменот на работата на американскиот државен секретар кој има должност да ја креира листата на санкции.
И амбасадорката на САД ги избегна медиумите на оваа тема. И премиерот без детали и насоки по посетата на тимот. Ќе се почека финалната листа, но затоа спротивно од изјавата на министерот за надворешни работи, Бујар Османи дека биле повикани.
Темата корупција била дел од разговорот на Ковачевски со советникот на државниот секретар на САД, Дерек Шоле, кој ја откажа посетата од здравствени причини. За американскиот тим за санкции беше објавено дека доаѓа за да изврши увид во корупциски предмети поврзани со поранешни и актуелни чинители. Македонските владини функционери кои пред доаѓањето на амбасадорката Агелер тврдеа дека нема сериозна корупција во нивните редови, го променија ставот, се заблагодарија на помошта, и порачаа дека има корупција од портир до врвот.
Павле Беловски