Бундестагот денеска ќе одржи дебата за истрагата за екстремно десничарската терористичка група која наводно планирала да ја собори германската влада, јави ДПА.
Комисиите за правни и внатрешни работи ќе се состанат на посебна седница, а членовите на германскиот Парламент ќе можат да поставуваат прашања за истрагата до парламентарната комисија за проверка, која заседава зад затворени врати.
Дваесет и пет осомничени, меѓу кои и поранешен пратеник, беа приведени во серија полициски рации во средата минатата недела. Според обвинителството, тие се обиделе да го урнат демократскиот поредок и да формираат нова власт.
Обвинителите сметаат дека главните осомничени припаѓаат на терористичка група поврзана со екстремистичкото движење „Граѓани на Рајхот“, кое не го признава авторитетот на германската држава.
