Шеснаесет илјади мегават часови повеќе од планираното ќе купи ЕСМ овој месец за да го надополни недостатокот од струја, неопходен за потребите на регулираниот пазар и на училиштата јавните установи и прехранбената индустрија. Наместо планираните 48.000 мегават часови на електрична енергија, ЕСМ планира само овој месец да купи од слободниот пазар 64.000 мегават часови струја.
Според официјалните податоци на ЕСМ, досега за овој месец се купени 40.600 мегават часови електрична енергија за кои се платени 16,3 милиони евра. Просечната цена по која се купува струјата е околу 400 евра за мегават час.
Сепак, по која цена и од кои фирми од слободниот пазар ЕСМ продажба ја извршила набавката не е познато, бидејќи сè уште не се објавени на официјалнот сајт на државната компанија.
Според информациите на Телма, досега се склучени три договори за набавка на струја, а се купува од исти фирми како што беше и минатиот месец.
Ако во октомври ЕСМ не набавуваше електрична енергија од слободниот пазар, пред сè, поради топлото време, во ноември беа потрошени 23 милиони евра за кои беа купени што значи дека досега се потрошени 40 милиони евра.
Од ЕСМ се на ставот дека зголемените набавки се резултат на тоа што од 1 декември на ЕСМ Продажба се приклучени и други потрошувачи по одлука од Влада, како фирми од прехранбената индустрија, училиштата и водостопанствата.
Надлежните се надеваат дека во декември сите енергетски објекти ќе работат со максимален капацитет и со тоа да се намали потребата од набавка на струја. За сега на мрежа се вратени термоелектраните Осломеј и Неготино а РЕК Битола се уште работи со два блока во исчекување на трансформаторот неопходен за старт на работа на Блок 3 во комбинатот.
Огнен Чанчаревиќ