Владата ќе назнали нов директор на Управата за Финансиската полиција откако директорот Арафат Муареми вчера поднесе оставка ден по истекувањето на шест месечниот в.д. мандат, потврдија за Телма од владата.
Муареми беше цел на предистрага на Обвинителството за гонење на организиран криминал и корупција раководено од Вилма Русковска поради што тој поднесе кривична пријава и претставки против обвинителката по што таа е суспендирана, а утврдени се пропусти во постапката за претрес.
Против Муареми (заедно со обвинителите на СЈО Артан Ајро и Гаврил Бубевски и сопственикот на Трансмет Сеад Кочан) беше поднесена кривична пријава од Државното правобранителство за злосторничко здружување и непостапување како истражител на поранешното СЈО, а во врска со наводно непостапување кое спречило ефикасна конфискација на 17,2 милиони евра имот на Трансмет по пресудата во предметот Труст.
Кривичната пријава беше поднесена во Обвинителството за гонење на организиран криминал и корупција кај Русковска на 8-ми април, а содржината на пријавата беше објавена во емисијата КОД, „Експлозија на кривични пријави за конфискацијата на Трансмет/Секој против секого“.
Постапката за пријавата отпочна и беше отворен предмет за предистрага, но досега нема информации дали е откриено нешто или е отфрлена пријавата на Правобранителството.
Муареми на својот официјален профил како директор на Финансиската полиција (првпат назначен во 2017-та по промената на власта), покрај кариерата од првото вработување во Финансиската полиција во 2008-ма година има посочено и дека бил предавач за конфискација во Косово.
„Учествува како главен предавач на Симпозиум за конфискација и финансиски докази во Приштина, Косово во организација на Embasy of United States“, стои во неговата биографија на сајтот на финансиската полиција каде има и печатни грешки во англискиот назив на амбасадата, иако Муареми навел дека зборува англиски, германски и српски јазик, покрај македонскиот и албанскиот.
Муареми уште не ја доставил оставката до влада, но мандатот му е истечен, а од владата најавија нов директор наместо него.