Цели две години борба за животот на секој пациент. Се бараше кревет повеќе, болничките возила едно по едно се редеа пред влезот на Клиниката. Зградата постојано полна, а модуларната болница за неколку дена исто така. Но, Инфективна сега ќе ги затвори вратите. Персоналот ќе се одмора, а објектот ќе биде дезинфициран, стерилизиран и реновиран. Така ќе биде во следните речиси три недели, затоа што нема ниту приближно толкав наплив на пациенти, како во минатото.
Ќе биде добро сите ние малку да земеме душа, да одмориме. Но, она што е главно е тоа да комплетно ја подготвиме Клиниката, значи не парцијално туку комплетно, за евентуален нов бран на зараза. Тоа може да се случи и не можеме да го игнорираме истото. Мораме да бидеме комплетно подготвени за примање пациенти, изјави дректорката Милена Стевановиќ.
Пациенти има има сè уште, и тоа само на четвртиот спрат во зградата. Но, тие веќе се или целосно оздравени, или сосема на крај со заздравувањето.
На прсти од една рака се бројат пациентите коишто во моментов се наоѓаат во болнички кревет на Инфективната клиника. Тие за многу кратко ќе си заминат дома, а наместо нив ќе дојдат екипите коишто ќе направат дезинфекција на целиот тој простор.
Заменските капацитети веќе се подготвени и планот е направен. Пациентите со Ковид коишто имаат потребна од болничка нега ќе бидат згрижени во најголемата болница во државата.
Пациентите ќе се префрлуваат во ГОБ „Осми септември“, но само привремено. Нормално, ние стоиме на располагање за секој евентуален нареден наплив на пациенти. Институтот за ТБЦ е подготвен за таа намена, вели министерот Беким Сали.
Персоналот на Инфективна утре заминува на одмор. Тие повторно ќе се вратат со скафандери и целосна заштитна опрема, на трети мај.
Петар Догов