Западните разузнавачки агенции поведоа психолошка војна против рускиот претседател Владимир Путин, кој исто така е поранешен разузнавач, по руската инвазија на Украина, пишува во анализата Си-Ен-Ен.
Соединетите Американски Држави и нивните сојузници создаваат слика за деморализирана и нефункционална руска војска која трпи катастрофални загуби на бојното поле, а во исто време испраќа до јавноста визија за растечките политички тензии во Кремљ.
Тие тврдат дека рускиот лидер е изолиран, дека добива лоши совети и дека нема точни информации за тоа колку лошо всушност оди неговата војна во Украина, пренесува Си-Ен-Ен.
На овој начин западните влади го спречуваат Путин да го дефинира главниот наратив на војната. Тие го направија тоа уште пред почетокот на војната, кога точно предвидеа дека Путин ќе изврши тотален напад на Украина, и покрај фактот што многу геополитички аналитичари го тврдеа спротивното.
Ова е тешка позиција за рускиот претседател, кој често користеше методи на информативна војна во минатото, особено додека се обидуваше да се меша во изборите во САД и во Велика Британија.
Посебно е интересно што западното разузнавање и дава на јавноста голем број декласифицирани оценки, што на Путин, поранешен офицер на КГБ, секако не му е удобно. Тие ја оставаат отворена можноста западните шпиони да имаат детален увид во текот на војната, но и внатрешната политика на Кремљ, што веројатно го налути Путин и може да создаде нови пукнатини во неговиот режим, се вели во анализата.
Подготвеноста на западните влади отворено да зборуваат за она што го гледаат во Кремљ, исто така, изненади многу поранешни разузнавачи.
„Тоа ги прави нервозни многу професионалци од разузнавањето, дури и поранешните како мене. Се разбира, многу вообичаено е да ги заштитиме нашите извори и методи“, изјави за Си-Ен-Ен Стив Хол, поранешен шеф на операции на ЦИА во Русија.
Дел од интригата околу пресметката на САД со Путин произлегува од самата природа на работата на разузнавачката заедница. Аутсајдерите, се разбира, не можат самостојно да ја проценат точноста на информациите што ги туркаат во јавноста разузнавачите, што значи дека јавноста не знае од каде и од кого доаѓаат овие информации. Но, тоа е целата поента – Русите сега се принудени да шпекулираат за тоа.