Во чест на 8-ми Март, во чест на мајката, сестрата, колешката, пријателката, и во чест на секоја жена, ВМРО ДПМНЕ организираше протестен марш по улиците на Штип. Организаторите од Унијата на жени рекоа дека протестираат за сите дискриминирани жени, посебно за оние кои треба да живеат со помалку од 150 денари на ден. „Ние сме посилни од предрасудите“, порачаа жените од Унијата и најавија дека борбата за еднаквост, правда, мир и развој – ќе продолжи и со наредните генерации.
„Во политиката мора да понесеме одговорност, не можеме да бидеме неми набљудувачи на реалните проблеми на сите жени. Податоците кои ги имаме како држава се поразителни. Само 18% жени се поседнички на имот! Само 2-3% се земјопоседнички, а јазот во платите изнесува 18%. Се прашувам каква е оваа држава во која за иста работа жените добиваат помали плати? Први сме на листите за отпуштање, последни на листите за унапредување. Ова се поразителни бројки кои мора да ги промениме! Кризите ни покажаа многу недостатоци и `не исправија пред бројни предизвици. Први на удар бевме токму ние жените и женското претприемништво.“, изјави претседателката на Унијата на жени на ВМРО ДПМНЕ, Жаклина Пешевска.
