Од Вишото јавно обвинителство потврдија дека во одговорот до Апелациониот суд Скопје доставиле одговор со кој изричито одбиваат Сашо Миjалков да биде пуштен од притвор поради опасност од бегство затоа што веќе има две пресуди за вкупно 20 години затвор.
Апелациониот суд одлучил сепак по барањето на Мијалков и го укинал притворот, ја прифатил гаранцијата од 11,1 милиони евра и му определил други мерки за обезбедување, одземен пасош и јавување во суд.
Обвинителката за гонење на организиран криминал и корупција Вилма Русковска кратко ни изјави дека разбрала за одлуката од медиуми и од новинари и дека за жалбата пред Апелација, надлежно е Вишото јавно обвинителство-Скопје.
Токму Русковска во февруари побара притвор за Мијалков поради определни информации кои ги добила дека поранешниот директор на тајната полиција се подготвува да избега десетина денови пред да биде изречена пресудата во случајот Тврдина таргет.
Тогаш Мијалков исчезна пред полицијата да му го врачи судското решение за домашниот притвор, а МВР распиша меѓународна потерница по него. Мијалков сам се појави во обвинителството.