Со 1.922 нови позитивни случаи од 32 градови во државата, забележано е намалување од 8,0% во однос на минатата недела, стои во извештајот на Институтот за јавно здравје.
Во текот на мината недела вкупно се пријавени 36 реинфекции, што е за 38,5% повеќе во однос на претходната недела.
Изминатава недела регистрирани се 66 смртни случаи од 22 градови, а најголем дел од нив се од Скопје. Од починатите најголем дел припаѓаат на возрасната група над 60 години, а регистрирани се починати лица и кај возрасната група од 50-59 години, две лица од 40-49 години и едно лице од возрасната група 30-39 години.
Забележително е намалувањето на инциденцата во 28 градови во државата во последните 14 дена во споредба со претходните 14 дена, со најголемо намалување во Берово. Во 7 градови се забележува зголемување на инциденцата во последните 14 дена, а најголемо зголемување има во Кичево, Гостивар и Виница.
Највисока кумулативна инциденца на 100.000 жители се регистрира во Кавадарци, Скопје и Неготино, а најниска инциденца од 4.765,8 заболени на 100.000 жители се регистрира во Македонски Брод.
Вкупно 347 лица се хоспитализирани во болниците што е за 18,7% помалку во споредба со претходна недела. Од нив, 243 се на кислородна поддршка и 12 на инвазивна/неинвазивна механичка вентилација.