Со недостиг од судии се соочува битолскиот Основен суд кој е со проширена надлежност и покрај од Битола, ги решава предметите од Општините Новаци, Могила и Демир Хисар. Има 17 судии, од кои едниот е претседател, кои годишно работат на 22 илјади судски предмети. По систематизација Основниот суд во Битола треба да има 25 судии.
- Но, во моментот функционираме со 17 судии што значи непополнети се осум места. Ние согласно бројките, податоците и искуствата со годините наназад во рамки на можностите, како суд со проширена надлежност, би требало да добиеме од Академијата, преку редовна постапка за избор, барем три до пет судии, вели Миле Димовски, претседател на Основен суд Битола
Со овој број на судии, Основниот суд во Битола е на граница за решавање на новопримените предмети, меѓу кои најзастапени се кривичните и прекршочните предмети. Излез од состојбата бараат со тоа што дел од предметите се распределуваат на судиите од другите оддели.
- Граѓанскиот оддел, без оглед на принципот на специјализација на судството, на седница на Совет на судиите беше договорени и прифатено, граѓанските судии да помогнат во кривичниот и прекршочниот оддел на начин што ќе се вклучат во распределбата и ќе решаваат и прекршочни премети, од фактот што судии се судии, додаде Димовски.
За работата на судиите до Основниот суд во Битола годишно пристигнуваат од 20 до 30 претставки од граѓаните, што според претседателот Димовски, не е голема бројка на поплаки.
Емилија Мисирлиевски