Вака денеска изгледаше приземјувањето на владиниот Лирџет на аеродромот Петровец со помош на летачкиот радар на НАТО авионот АВАКС и два борбени авиони Ф-16 на грчкото воздухопловство кои беа дел од вежбата за заштита на македонското небо од страна на НАТО. Вежбата значеше и официјално почеток на НАТО „air policing“ мисијата во нашата земја, со што Македонија и официјално стана дел од колективниот систем на Алијансата за воздушно патролирање.
„Од денеска да можеме да кажеме дека безбедноста на нашето небо е дел од НАТО безбедноста“, рече министерката Шекеринска.
Ф-16 кои го надлетаа Скопје на 500 метри висина, полетаа од Грција и за 10-на минути веќе беа над главниот град на земјава пресретнувајќи го Лирџетот по што слетаа на аеродромот Перовец каде веќе беше паркиран АВАКС-от. Авионите на НАТО предизвикаа голема љубопитност кај присутните гости. Некои од нив и седнаа на пилотското место во грчкиот ловец, додека од НАТО безбедноси причини АВАКС-от остана недостапен за нив и можеше да се гледа само од дистанца.
Инаку Македонија пред помалку од еден месец го потпиша техничкиот аранжман за контрола на воздушниот простор над земјава од страна на НАТО, а Грција е земјата-членка која во рамки на тоа ќе патролира по македонското небо.
„НАТО воздухопловното патролирање е клучен дел од колективната одбрана, што служи како столб на Алијансата и овозможува подеднаков стандард на обезбедување на небото на секоја од земјите – членки. И ги обезбедува члнеките 24/7“, изјави Де Ла Круз Каравака.
Грчката авијација и досега го штитеше македонското небо во рамки на билатералниот договор меѓу Скопје и Атина потпишан во 2019, а кој почна да се спроведува една година потоа, по влезот на земјава во НАТО.
Тамара Грнчароска