На првиот работен ден наредната недела ќе се знае дали ќе се блокира работата на штипскиот совет или ќе се потпишат нови свечени изјави. Решението од државниот инспекторат за локална самоуправа е пристигнато вчера и во него какошто Телма и информираше стои дека изјавите без уставното име се спротивни на Уставот. Штипскиот градоначалник најави дека ќе има консултации со правниците. Тој во документот видел и политика, како и начин да се блокира работата на советот.
Советниците од ВМРО ДПМНЕ, кои и се мнозинство во советот најавија дека ќе имаат координации, откако ќе го видат решението.
Опозициските советници најавија дека ќе дојдат на закажаната седница во понеделник и тие ќе го бараат решението на инспекторатот за локална самоуправа. Но, дали ќе останат на третата седница ќе зависи од какви одлуки и чекори ќе преземе позицијата.
Рокот да се постапи по решението е 15 дена. Вишите инспектори кои пред седум дена извршија вонреден надзор и тогаш потенцираа дека се надеваат на соработка, доколку службите и советниците не постапат по него најавија и дека може да донесат одлука за „запирање на прописи“. Што ќе значи блокада на работата на советот.
Викторија Димитрова Јованова