Паркинг во општина Аеродром спроти полициската станица. Возило бела „Шкода“. Вратите и хаубата изутринава зацементирани со градежен материјал „пурпена“. Возилото е на поранешната претседателка на Советот на Град Скопје Љубица Јанчева и трет пат во една година е мета на вандали.
Јанчева која е партиски функционер на општинската органзиација на СДСМ во Аеродром и советник во Град Скопје нападот врз возилото им го препишува на политичките неистомисленици, а на новоизбраниот градоначалник на општината каде што живее, му порача дека безбедноста и сигурноста на граѓаните е загрозена. Додава дека ова не е првпат некој да ѝ испраќа пораки на ваков начин. Сторителите ги повикува да разговараат, а не да се служат со вандалски мерки во 21 век.
На дирекнтата прозивка од Јанчева до градоначалникот Тимчо Муцунски дека заплашувањето е наменето кон политичките неистомисленици, Муцунски вината ја посочи кај Министерството за внатрешни работи. Го осуди чинот и побара редовни патроли кои ќе ја гарантираат безбедноста на сите жители во Аеродром.
Возилото на Јанчева е во раце на МВР за да се откријат сторителите, и целта на овој вандалски чин кој се одвивал во непосредна близина на полициската станица во општина Аеродром.
Павле Беловски