„Честит роденден, драга младино! Одбележуваме 30 години од постоењето силна и развојна социјалдемократска младина!“
Ова е последната објава од СДСМ на социјалните мрежи. Доаѓа во момент кога целата јавност споделува дилема: ќе даде оставка Зоран Заев или не.
Тој не дал ниту една изјава откако по вториот круг понуди оставки и од премиерската и од партиската функција, разочаран од изборните резултати. Вечерва, ќе ги разгледуваат и членовите на Извршниот и на Централниот одбор. До последен момент, останува неизвесна оставката на лидерот и нејзиното прифаќање.
Ако го направи тоа, стартува рокот од 15 дена, во кој Извршниот одбор треба да донесе одлука за распишување предвремени внатрепартиски избори за нов лидер.
Во партијата провејува и мислењето дека сега не е време за оставки, туку за континуитет во справувањето со здравствената и енергетската криза.
Ако ги послуша ваквите аргументи, Заев ќе ја одложи оставката за некоја наредна седница на партиските тела.
Тие ќе заседаваат на два дена пред расправата за доверба на Влада, што во Собранието ја побараа ВМРО ДПМНЕ, Алијанса, Алтернатива, Беса и Левица. Иницијативата ја поднесоа откако Заев не го испочитува рокот што му го даде Мицкоски за да си замине од премиерската функција.
Сега, се шпекулира дека СДСМ има намера уште еднаш да покаже дека ВМРО ДПМНЕ нема мнозинство да ја урне Владата.
Но, се шпекулира и дека Заев денес-утре ќе даде оставка која треба без дискусија да се констатира во Собранието на првата наредна седница, што би значело дека ќе нема расправа, иако опозицијата интензивно се подготвува.
На сите политички и деловнички калкулации, владеачката партија кусо одговара: „СДСМ продолжува да разговара и да иницира соработка со сите прогресивни и демократски сили, со цел да обезбедиме стабилна иднина на нашата држава и на целиот народ“.
Соња Николовска