Дел од здравствените работници во прилепската болница секојдневно лекуваат Ковид-позитивни пациенти и тоа оние најтешки случаи кои лежат во модуларната болница или на инфективното одделение, но без плата и без самите тие да бидат здравствено осигурени.
Свесни за ризикот кој го носи нивната работа, 6 сестри и 2 болничарки почнале да работат среде пандемија потпирајќи се на ветувањата дека „следниот месец“ ќе им биде решен статусот.
Дел од нив се распоредени и на други одделенија. Но, сите тие не биле свесни дека и по повеќе од половина година ништо нема да биде сменето.
„Повеќе од осум месеци слушаме само лажни ветувања, а никој нема слух за нашиот проблем. Секојдневно сме изложени на ризик од зараза, а без здравствено осигурување и во моментов една од нас е позитивна. Работат редовно и по 12 саати, 8 саати, ноќни транспорти се. Работат во модуларната болница, инфективно одделение, стерилизација и по други одделенија. Веќе поминаа 8 месеци. “ – вели Симона Петреска, медицинска сестра во ЈЗУ Општа болница Прилеп.
Од менаџментот на прилепската болница велат дека причина за неисполнетите ветувања кон дел од нивните здравствени работници е спојувањето на двата правни субјекти, Здравствениот дом и Општата болница – Прилеп.
Уверуваат дека во моментов се подготвува нова систематизација која чека на одобрување од страна на Министерството за здравство и Министерството за информатичко општество.
Потоа ќе може да се распишат и огласи за работни места кои ќе бидат одобрени, информира Кети Смилеска, директорка на општата болница „Борка Талески“ во Прилеп.
Петар Догов