Согласно Уставот, член 93, Владата на која и е изгласана недоверба, која поднела оставка или на која мандатот и престанал поради распуштање на Собранието, останува на должност до изборот на нова Влада.
Значи, формално-правно, премиерот и актуелната влада продолжуваат со работа сѐ додека претседателот на државата не го довери мандатот за состав на Влада на кандидатот на партијата, односно партиите што имаат мнозинство во Собранието. Потоа, новиот мандатор во рок од 20 дена од денот на доверувањето на мандатот, треба на Собранието да му поднесе програма и да го предложи составот на Владата.
Член 219 од деловникот на собранието вели: Владата, претседателот на Владата или член на влада може да поднесе оставка до претседателот на собранието во писмена форма кој потоа веднаш ја доставува до претседателот на државата и до пратениците.
А според член 220 од деловникот, собранието на првата наредна седница без претрес констатира дека на претседателот на владата и на членовите им престанал мандатот на денот на одржување на седницата.
Што се однесува до најавената оставка на лидерката позиција на СДСМ, според партискиот статут, Извршниот одбор на партијата во рок од 15 дена од констарирањето на оставката треба да распише вонреден конгрес за распишување на внатрепартиски избори за нов претседател.
Значи, никој од актуелните потпретседатели, според сегашниот статус на партијата, не може да ја врши претседателската функција.