Јана Серафимова и емисијата Ферплеј стартуваат во сабота на ТВ Телма со што ќе се збогати викенд понудата на телевизискиот канал.
-„Ферплеј“ е ТВ проект на каков што одамна сакав да работам, бидејќи спортот не учи на многу позитивни нешта, а животот и секојдневието на спортистите се секогаш инспиративни. Па затоа, содржините на оваа емисија ќе имаат забавен и едукативен карактер, нема да бидат наменети само и единствено за спортските фанови, туку сакам да делуваат мотивирачки буквално за сите. Ќе дознаваме каков е патот до постигнувањето на блескави спортски успеси, трофеи и медали за кои не е потребен само талент туку: дисиплина, посветеност, макотрпна работа и НАЈПОСЛЕ – барем малку среќа. А, спортистите од Македонија и странство ќе откријат и што друго е дел од нивниот живот, какви таленти поседуваат освен оние за спорт, што ги исполнува и што ги прави среќни, вели водителката Јана Серафимова.
Колку спортот е дел од твојот живот?
Јана Серафимова: Спортот пред сè го сакаат и следат сите членови на моето семејство. Дома, редовно на ТВ е вклучен некој спортски канал и се гледа некаков натпревар. Брат ми Никола е фудбалер и единствен кој професионално се занимава со спорт, во моментов како играч на Унгарски Залаегерсег и Македонската фудбалска репрезентација. Јас со спортови или физичка активност се бавам рекреативно, најдолго и најдисциплинирано до сега тренирав кик-бокс. Едно е сигурно – дека поседувам спортски дух.
Емисијата Ферплеј и Јана, свеото деби ќе го имаат со премиерната емисија во која главен гостин е новиот селектор на фудбалската репрезентација Милевски кој го презеде националниот тим по Европското Првенство на кое репрезентацијата за прв пат настапи.
-Има многу спортисти кои би сакала да ги интервјуирам, но број еден на таа листа е Лионел Меси. Причината е и повеќе од јасна, имам милион прашања за играчот кој важи за светско чудо, и покажува игра што на моменти делува и нереална. Би сакала да ја почувствувам и пренесам на гледачите атмосферата од финале на Вимблдон на пример, или финале во Фудбалската Лига на шампиони. Секое сериозно натпреварување од кое се дел Македонските репрезентации, е и ќе биде број еден на листата, вели Серафимова.
Фер плеј е нова емисија со спортска тематика, со која ќе „управува“ Јана која својата кариера ја почна пред 5 години.
-Мојата авантура во светот на медиумите започна во 2016 година, па вечно ќе им бидам благодарна на оние кои тогаш веруваа во мене и ми дадоа шанса, а и знаење. Ја сакам креативната работа која медиумите ми даваат простор да биде мое секојдневие. Сум била дел од различни типови на Тв проекти како дел од редакциите за забава и култура, утринска програма, естраден/забавен Магазин.Како репортер во информативните изданија ги следев настаните од културата, а мој авторски проект беше емисијата „Фан Пит“, раскажува Јана Серафимова.
Првото издание на „Ферплеј“ со селекторот Благој Милевски е во сабота на 23.10.2021. во 19:15 часот на ТВ Телма.