Струга и Силекс ремизираа на првите натпревари во новоформираната Конференциска лига на УЕФА. Стружани како дебитанти на меѓународната сцена извлекоа 1-1 на гостувањето кај Лиепаја со гол во самиот финиш, додека истиот резултат гласеше и на натпреварот помеѓу Силекс и молдавски Петрокуб.
Летонскиот клуб го отвори резултатот во 31.минута со голот на Бразилецот Додо. Струга дојде до значајно реми со голот на Бесир Исени постигнат во 93.минута од натпреварот.
Освојувачот на Купот, кој лани го загуби прволигашкиот статус Силекс исто така одигра 1-1 против Петрокуб. На теренот на ФФМ, момците на тренерот Горазд Михајлов поведоа уште во 5.минута преку Кристија Додевски. Гостите го израмнија резултатот длабоко во судиското продолжение на првото полувреме преку Сергио Платица.
Реванш натпреварите се играат за една недела.
