Тони замина, бирократијата остана. Детето кое 18 години немаше извод и матичен број, нема да има ниту посмртница, а нема ни одговорност за тоа што живееше како фантом и почина без да добие медицинска помош. Семејството најавува тужби за институциите кои со години ги влечат за документи, за медиумите кои објавија дека починал на улица, но и за докторите од Брза помош, кои таа вечер не дошле на повик затоа што пациентот бил млад.
Семејството направило се` што може за да му помогне, биле со него до 6 часот утрината, кога дошла и Брзата помош, но за да констатира смрт од непозната причина. Точната причина се` уште не се знае иако, братот на фејсбук објави дека првично ги информирале дека станува збор за излив во мозокот.Анализите во Судска медицина траат, а резултатите ќе бидат предадени во Обвинителството.
Државниот здравствен инспекторат се` уште не ја истражува постапката на лекарите, затоа што никој до нив не поднел претставка. Од Брза помош, пак, не сакаат да даваат изјави, велат, се` што имаат, ќе кажат доколку биде покрената постапка.
Заменичката-народен правобранител, која со години се бореше и наидуваше на затворени врати кај институциите обидувајќи се да му помогне, вели дека овој случај ќе оди на совеста на сите надлежни државни органи.
Последните денови на 18- годишниот Тони му поминале учејќи за матурскиот испит, поради што бил под притисок. Бил одличен ученик, со сите петки, а планот му бил да се запише на Правниот факултет. Училиштата и невладината организација во која во меѓувреме работел биле единствените кои не му правеле проблем затоа што е човек без идентитет.
Роден е во вонбрачна заедница, од мајка која тогаш уште не била разведена формално од поранешниот сопруг. Матичното одделение затоа и одбиваше да му даде матичен број и да го впише во книгата на родени, занемарувајќи го фактот дека помеѓу неговите биолошки родители веќе постоела суштинска вонбрачна заедница.. Го оспорувале татковството и поминал вистинска голгота по институциите кои му го оспорувале и датумот на раѓање, па дури му барале и ДНК анализа. Брат му и сестра му, кои се родени во Србија, исто така за времетраење на вонбрачната заедница и формалниот брак на нивната мајка со поранешниот сопруг, сепак се запишани во матичната евиденција како деца на нивните биолошки родители.
Далиборка Демјанска Цветановска