По случајот со родилката од Дебар, Веапоска, на која што ѝ беа извадени здрави органи – бубрег, јајник и матка, се огласи и д-р Мухамед Асани.
Доцна синоќа, на социјалната мрежа Фејсбук напиша статус, во кој пишува дека совеста му е чиста, и дека иако чекал ставот да го кажат институциите, сепак неговото молчење јавноста погрешно го сфатила. Асани пишува:
„До денеска не се изјаснив, не затоа што немав што да коментирам или затоа што совеста не ми е чиста, како што и мислеа некои луѓе! Но сето тоа го направив во почит на одлуката на соодветните установи. Иако против мене имаше толку обвиненија со цел да ми го уништат авторитетот, сепак мислев дека првично својот став треба да го кажат соодветните одговорни институции. Но сфатив дека во дел од јавноста ова е погрешно сфатено..Пациентката е примена во болница и направена е предоперативна подготовка по протокол.
Беше втор царски рез кај пациентката, и нормално како по секој оперативен зафат,ризикот и можноста за компликации се зголемуваат во секој нареден зафат.
На пациентката детално и е објаснета операцијата, ризиците, интра и постоперативните компликаци, истата свесно со своерачен потпис се согласила.
Постоперативно пациентката беше под надзор секој ден од дежурните екипи (двајца лекари специјалисти гинеколози-акушери и 4 сестри акушерки), кои констатирале дека пациентката секој ден била стабилна.
Петтиот постоперативен ден состојбата на пациентката се комплицирало (интраабдоминална хеморагија),хеморагичен шок, живото загрозувачка состојба ако не се интервенира навреме и брзо.
Итно влеговме во операциона сала екипа од двајца гинеколози, двајца хирурзи и двајца анестезиолози, секој работејќи на својата област.
После една екстремно тешка и вонредна работа, која траеше цели 8 часа, успеавме да и го спасиме животот на пациентката.“, напишал д-р Асани.
Министерот Филипче вчера го разреши Асани од функцијата директор на струшката болница, два месеци откако беше обелодент првиот случај со родилката во Дебар на која и беа извадени матка, јајник и бубрег. Откако лекарската комора не утврди лекарска грешка, сега втора комисија од Министерство за здравство ќе го истражува случајот.
Но без одговори останува и друго породување во кое Асани е обвинет од родителите за лекарска грешка поради која плодот останал без кислород.