Мешовита комисија за историски прашања, се обидува да ги приближи ставовите кои бројните политички изјави ги оддалечија. Но, и покрај најавеното вето од бугарска страна, Скопје со пораки дека разговорите со Софија ќе продолжат до конечно решение.
Македонско-бугарската комисија вчера ја започна дводневната средба посветена на содржината во македонските учебници по историја за средновековниот и раноосманлискиот период и евентуалното заедничко чествување на Гоце Делчев.
Официјалното соопштение за тоа што е постигнато се очекува денеска, иако пред два дена бугарскиот копретседавач Ангел Димитров, за БГНЕС навести неуспех по одредени прашања, посочувајќи на разлики во изјавите на политичарите и мислењата на македонските историчари. Драги Ѓорѓиев, копретседавачот од македонската страна, пак оцени дека е академски неприфатливо работата на историчарите да се подредува на политички барања.
Премиерот Зоран Заев пак порача дека работата на Комисијата се одвива во пријателска атмосфера, што го оцени како сигнал дека сите се трудат да биде постигнат напредок. Тој изрази уверување дека многу брзо ќе има и решенија, преку кои, како што рече, ќе го градиме заедничкото пријателство на двете земји.