Македонските и бугарските историчари од рано утрово ја разгледуваат содржината на нашите учебници по историја. Поради пандемијата, овојпат работат онлајн. Главна тема им е средновековниот и рано-османлискиот период, иако неизбежно ќе се разговара и за евентуално заедничко чествување на Гоце Делчев. Но, не откриваат дали досега постигнале некаков компромис. Велат дека ќе се воздржат од коментари до утре, кога ќе завршат со работата. Сепак, копретседавачот од бугарска страна, Ангел Димитров, предвреме навести неуспех по одредени прашања. Во интервју за БГНЕС, вината за тоа ја префрли на македонските колеги.
Професорот Ѓоргиев, кој е копретседавач од македонска страна, е зачуден од изјавата на неговиот колега.
Ова е 11-та средба на македонско-бугарската Комисија. На претходната беа разгледувани и усвоени препораки за бугарските учебници за овие периоди.
За период од две години, усвоени се препораки и за подобрување на учебниците по историја за шесто одделение во земјава и петти клас во Бугарија, кои се однесуваат на античкиот период од минатото. Дадени се и препораки за подобрување на учебниците за 6 клас во Бугарија, односно 7 одделение кај нас.Комисијата има препорачано и заедничко одбележување на пет историски личности од значење за историјата и културата на македонскиот и бугарскиот народ, но и за другите народи на Балканот и во Европа – Свети Кирил и Методиј, Свети Климент, Свети Наум и цар Самуил.
Далиборка Демјанска Цветановска