Во очекување на објавувањето на пресудите за лидерите на Златна Зора во Атина, пред судот повторно се собраа демонстранти барајќи најстроги казни. Минатата недела судот ја прогласи Златна Зора за криминална организација, обвинувајќи 18-мина за нејзино водење. Меѓу обвинетите се Никос Михалолиакос, основачот и претседател на партијата и поранешните пратеници како Илијас Касидиарис, Христос Папас, Јоргос Герменис и европратеникот Јоанис Лагос, кој денеска допатува од Брисел за да ја слушне пресудата.
Сите ние сме тука собрани за нацистите да бидат затворени со најдолгите можни казни, порачува пензионерот Леонидас Ренѕакис.
Судијата Марија Лепениоти која претседава со судскиот совет изјави дека олеснителни околности ќе им бидат прифатени за 4 поранешни пратеници и 10-мина други обвинети поради старост, каење и претходна неосудуваност. Проценка на судот со која демонстрантите не се согласуваат.
Денеска сме собрани пред судот за да објавиме дека сакаме нацистите, членовите на нацистичката организација Златна Зора, да не добијат никакво ублажување на казните и да одат во затвор најдолго што можат, вели Сиригос Валсамос од синдикатот на градежници.
Судскиот процес трае пет години и е резултат на истрагата која започна против организацијата по убиството на музичарот Павлос Фисас во 2013 година кој беше избоден до смрт од страна на член на Златна Зора. Партијата тогаш беше на врвот на својата популарност освојувајќи 18 пратенички места на изборите во 2012 година, во период кога Грција се бореше да излезе од должничката криза. Убиството на Фисас беше кулуминација на еден насилен циклус поттикнат од Златна Зора обележан со речиси секојдневни напади на политички неистомисленици и мигранти.
Игор Трајков
