За една недела ќе се знае што точно ќе содржи четвртиот пакет економски мерки за справување со последиците од коронакризата, но и колку средства ќе се издвојат за него.
Она што во моментов извесно е, како што информираше, вицепремиерот за економски прашања, Фатмир Битиќи, е дека тој ќе биде значително голем. Она што ќе го содржи, вели тој нема многу да му се разликува од претходните пакети, бидејќи и овој се следи структурата на БДП.
„Но ќе отиде и малку подалеку, а тоа е да се помогне и во секторите за кои што можеби претходно немаме дадено помош, а тоа е директно поврзано со образовните процеси со згрижувањето на децата во предучилишна возраст , но и низа на други мерки кои значат стимулација, кои што можеби граѓаните и компаниите не ги гледаат како директна финансиска стимулација“, вели Битиќи.
Колку точно ќе тежи, пак ќе зависи од ребалансот на буџетот и од проценките на институциите дали ќе ги искористат или не до крајот на годината средства кои им се на располагање.
На сите кои ќе пријават дека нема да можат да искористат најмалку 95 проценти од средствата, тие со ребалансот ќе бидат пренаменети за четвртиот пакет помош.
„Мислам дека на почетокот на неделата ќе имаме точна информација. Во зависност од таа проценка ќе можеме на крај од неделата да донесеме заклучок на економскиот совет во владата за тоа, колкав ќе биде целиот пакет. Но секако тоа што можам да кажам, ќе биде значително голем економски пакет“, вели Битиќи.
Планот е новиот пакетот економска мерки да ги опфати месеците до крајот на годината и, како што вели Битиќи, да опфати повеќе категории на луѓе.
За четвртиот пакет мерки ќе се искористат и преостанатите 30-на проценти од евро-обврзницата од 700 милиони евра која ја издаде владата во мај кога беше направен и ребаланс на буџетот.
Тамара Грнчароска