За прв пат без традиционалното војничко гравче но и за прв пат како членка на НАТО алијансата се одржа прославата на денот на Армијата. Плотуните од касараната Илинден го одбележаа стартот на свеченоста.
Претседателот Пендаровски во своето обраќање нагласи дека членството во НАТО ја крева на многу повисок степен и одговорноста на Армијата во која мора да се продлжи со инвестиирање модернизирање и опремување. Но тој се осврна и кон еден од најголемите проблеми во државата – криминалот и корупцијата кои се спротивни на темелните вредности на НАТО и ЕУ каде се клучни владеењето на правото и функционалната правна држава.
Министерката Радмила Шеќеринска пак кажа дека била разочарана од условите и состојбата во Армијата кои ги затекнала со стапување на функцијата. Зголемувањето на Буџетот на Армијата, повисоки плати, нова лична и борбена опрема и новите закони за Армијата се само дел од чекорите потребни за членство во Алијансата.
Началникот на ГШ, генерал мајор Васко Ѓурчиновски, истакна дека членството во Алијансата е огромен успех и признание и им се заблагодари на стратешките партнери за помошта во обуката на армијата и командниот кадар како и во опремувањето.
На прославата претседателот Пендарвоски со Орден за воени заслуги ги одликува Баталјонот за воено-медицинска поддршка, Третиот пешадиски баталјон од Првата пешадиска бригада и Канцеларијата за соработка во одбраната на Соединетите Американски Држави.
Денот на Армијата го честитаа и премиерот Оливер Спасовски како и двајцата лидери на најголемите политички партии од македонскиот блок, Зоран Заев и Христијан Мицкоски, кои истакнаа дека нејзините припадници се луѓето на чиј грб почива државноста но и дека се гаранти на регионалниот и светскиот мир и стабилност и тѕреба да боидат горди на тоа.
Огнен Чанчаревиќ