Стравот од неизвесност, немањето стабилна работа, како и лошата
финасиска состојба се најчестите причини што ги навеле жртвите на
семејно насилство како причина зошто останале предолго со насилниот
партнер. Во изминатите месеци во струмичкиот Центар за згрижување се
обратиле 50 жртви на семејно насилство од Југоистокот, а речиси
половина биле згрижени. Најголемиот дел од нив потврдиле дека немаат
каде да одат, ниту дека можат да опстанат со децата и минимални
примања.
Во Центарот каде се обезбедува бесплатно сместување, храна и правна и
психо-социјална помош на жените – жртви и нивните деца, велат дека
бројот на пријави расте, жените почесто се осмелуваат да излезат од
насилниот дом.
И СВР Струмица потврдува дека има голем број пријави за семејно
насилство. Бројот на пријавите во првите четири месеци од годинава е
за 30% повисок од истиот период лани, за што сметаа дека причина е
пандемијата и долгите викенди кога имаше забрани за движење за
граѓаните.
Сузана Мицева
