49 милиони Французи имаат можност денеска да гласаат за новиот Претседател на државата, или можеби поточно кажано, кои од дури 12-те кандидати ќе учествуваат во вториот круг од гласањето, по 14 дена.
Кампањата за овие избори помина во сенка најпрвин на пандемијата Ковид-19 а потоа и Руската инвазија на Украина.
44 годишниот Емануел Макрон, кој го бара својот втор 5-годишен мандат, малку време потроши во кампањата, фокусирајќи се наместо тоа на Европската реакција на војната во Украина.
Кога дојде на власт во 2017-тата година, Макрон ги порази двете доминантни политички опции во државата дотогаш, Републиканците на десниот центар и Социјалистите кај левицата, кои се уште се мачат да ја вратат довербата на Французите.
Главните ривали за Макрон сега се Марин Ле Пен од крајната десница и Жан Лук Меленшон од левицата.
Гласачките места се отворија во 8 часот наутро во внатрешноста на Франција а ќе завршат во 20 часот. Тоа што додава на неизвесноста е фактот дека според едно од последните истражувања на јавното мислење дури 37% од граѓаните се уште не донеле одлука за кого ќе гласаат.
„Вистина е дека сме малку загрижени. Јас сум загрижена заради овие поделби, но загрижена сум и заради овие екстремни движења. Се надевам на Претседател кој ќе успее во обединувањето на Французите“ – вели една гласачка.
„Јас секако сум многу загрижена. Дури и Макрон повторно да биде избран, пак ќе биде многу тешко. Има големи шанси кои ги пропуштивме. Ковид, Украина па дури и панелот за климатски промени, тие ни требаа за нови предлози, нови идеи и нови акции. Но, сега ги кажуваме истите изјави. Секако, ќе биде многу тешко“ – додава друга гласачка.
„Големо прашање. Што очекуваме од изборите? Иднината на Франција се одлучува. Овие денови пред се очекуваме мир. Исто така очекуваме просперитет и општи политики за заеднички живот. Тоа е најважно. Тоа што на Франција сега и треба е заеднички живот и заеднички вредности кои ги цениме, како слободата и секако секуларизмот, но исто така и еднаквоста која се мачиме да ја најдеме во општеството, иако ни е напишана на ѕидовите на нашите општински совети“ –смета еден млад Французин.
До пладне, на гласачките места се појавиле 25 отсто од регистрираните избирачи, три проценти помалку од изборите пред 5 години и најнизок одзив во последните 20 години.
Проценките се дека дури 28 проценти од луѓето со право на глас може да апстинираат а најмал интерес покажуваат младите луѓе на возраст од 25 до 34 години.
Откако доживеа дебакл во вториот круг од изборите во 2017-тата, Ле Пен се обиде да го ребрендира својот Национален Фронт, иако многу од политиките и останаа непроменети.
На овие избори, таа дури делува поумерено во според со ривал од крајната десница Ерик Земур.
Француската економија можеби е во солидна состојба и невработеноста изнесува само 7,4 %, но обичните луѓе не ги чувствуваат придобивките.
Во продавниците, на пазарите, на бензинските пумпи, цените се зголемуваат , додека растат и цените на електричната енергија.
Голем дел од кандидатите затоа ветуваат и зголемување на минималната плата, во некои случаи и за повеќе стотици евра.
Никола Илиевски