Комитетот за надворешни работи на Европскиот парламент денеска ќе гласа за Извештајот за напредокот на Македонија, подготвен од известувачот Томас Вајц. Очекувањата во Скопје се дека документот ќе испрати недвосмислена порака за поддршка на македонскиот јазик и идентитет, без дополнителни условувања.
Првично, извештајот требаше да биде на дневен ред на 4 јуни, но беше одложен на барање на Вајц поради силни притисоци од бугарски европратеници, кои не се согласуваа со јасните формулации за македонскиот јазик и идентитет. Вајц потенцираше дека документот е подготвен во координација со сите пратенички групи во ЕП и не смее да биде жртва на билатерални блокади.
Премиерот Христијан Мицкоски претходно изјави дека извештајот бил цел на обиди за редефинирање на македонскиот идентитет, со внесување изрази како „модерен“ или „сегашен“ македонски јазик.
Тој додаде дека огромното мнозинство во Европарламентот ја поддржуваат Македонија и се спротивставуваат на блокирачката политика. Според агендата на Европскиот парламент, седницата на Комитетот за надворешни работи ќе започне во 9:00 часот, а извештајот на Вајц е прва точка на дневниот ред. Повеќе амандмани од бугарски европратеници се веќе поднесени – дел од нив дури бараат документот воопшто да не се презентира.
