Социјална работничка е ранета попладнево на своето работно место во Центарот за социјални работи во Прилеп од страна на 50-годишен маж, кој пред 4 дена побегнал од Психијатриската болница во Демир Хисар.
Тој со пиштол ја застрелал 36 годишната социјалана работничка во стомакот, по што таа веднаш е префрлена во Прилепската болница, од каде велат дека жената е надвор од животна опасност, со влезно излезна прострелна рана, но, во стабилна состојба.
-Има прострелна рана, но нема зафатено витални органи. Повредата е поткожна во долниот дел од десен хемиторакс, изјави др. Кире Јоноски, директор на Општа болница Прилеп.
Настанот се случил нешто пред 14 часот денеска, кога 50-годишниот маж, кој побегнал на 20-ти март од Психијатриската болница во Демир Хисар, влегол во Центарот за социјални работи во Прилеп, вооружен со пиштол и нож. Ја побарал токму 36-годишната социјална работничка и веднаш стрелал во неа.
Полицијата веднаш излегла на местото на настанот при што лицето е лишено од слобода.
Тој и претходно е осудуван за кривични дела сторени врз истата жртва – еднаш на 1 година и 3 месеци задолжително лекување во Психијатриската болница од каде избегал, а другата казана е затворска, но предметот е се уште во битолска Апелација.
Од битолската полиција соопштија дека работат на расчистување на случајот.
Емилија Мисирлиевски