Картелско здружување на осигурителни компании е формирано во април минатата година, кога е договорено да се поскапи премијата за осигурување при регистрација на возилата, соопшти Комисијата за заштита конкуренција (КЗК).
Комисијата донела прелиминарна одлука според која 10-те осигурителни компании имаат законски рок од 15 дена да се произнесат. Доколку наводите се потврдат, Комисијата ќе донесе прелиминарна одлука со предлог казна која се движи до најмногу 10 проценти од остварениот промет во 2023 година.
Во соопштението на КЗК стои дека имаат цврсти докази, прибрани при увид во канцелариите на осигурителните компании, како и докази прибрани од нивната меѓусебна комуникација.
Во април минатата година, меѓу двата изборни круга, осигурителните компании ја поскапеа премијата за 15,44 проценти, што резултираше со дополнителни трошоци за граѓаните и до 1.200 денари при регистрирање на возилата. Одлуката беше обжалена од министерството за финансии и потоа Владата на седница донесе одлука со која го утврди највисокито износ за режиски трошоци.
