Украинските сили можат да користат британско оружје на руска територија кога се бранат, потврди Министерството за одбрана.
Портпаролот на британското Министерство вели дека Украина има „јасно право на самоодбрана од нелегалните напади на Русија… тоа не ги исклучува операциите внатре во Русија“, пренесува „BBC“.
„Јасно појаснуваме за време на процесот на подарување дека опремата треба да се користи во согласност со меѓународното право“, додаваат тие.
Но она што изрично се забранува е употреба на британски ракети со долг дострел.
Политиката значи дека на руското бојно поле може да се видат противтенковски ракети, артилерија, оклопни возила и друго оружје на ОК.
Но, ракетите на Обединетото Кралство „Storm Shadow“ ќе останат вон употреба надвор од границите на Украина.
Даунинг стрит претходно соопшти дека овие проектили со долг дострел може да се користат само за конфликт во границите на Украина.
Ненадејниот прекуграничен упад на Украина на одреден начин ја враќа довербата на Западот во нејзините способности за копнена војна.
Со месеци наративот е прилично депресивен за Украина и нејзините сојузници: бавно, постепено напредување на Русија во Донбас, немилосрдно бомбардирање на нејзините градови од руски беспилотни летала и проектили, најава за неизвесност околу можното второ претседателство на Трамп и губење на воената помош од САД.
Украина успешно ја избрка руската морнарица од северозападниот агол на Црното Море.
Исто така, покажа дека може да погоди цели како далечни аеродроми и складишта за муниција длабоко во Русија.
Но, неуспехот на летната офанзива на Украина минатата година доведе многумина да заклучат дека барем на копно, Украина на крајот беше на патека на губиток.
Се разбира, сè уште не њ познато како ќе заврши овој упад. За Путин и Кремљ тоа е секако неподносливо и нема да бидат расположени да прават отстапки за Киев.
Но, засега, Украина се покажа повеќе од способна да управува со „војување со комбинирано вооружување“ – користејќи ги сите елементи како тенкови, артилерија, противвоздушна одбрана – предизвикувајќи пофалби од бројни западни воени експерти.