Лицето кое беше убиено за време на атентатот врз поранешниот американски претседател Доналд Трамп во Пенсилванија е Кори Комператоре, поранешен пожарникар од Бафало.
Комператоре бил идентификуван од членови на неговото семејство. Тој, како што пренесуваат американските медиуми, го загубил животот додека се обидувал да ги заштити својата сопруга и ќерките кога напаѓачот Томас Метју Крукс отворил оган врз Трамп за време на предизборниот митинг.
Сестрата на жртвата, Даун Комператоре Шафер, во објава на Фејсбук напиша дека Кори „бил херој кој ги штител своите ќерки“.
– Неговата сопруга и девојките го преживеаја незамисливото. Мојот помал брат штотуку наполни 50 години и имаше уште многу живот. Омразата нема граници и љубовта нема граници. Молете се, бидејќи ова изгледа како ужасен кошмар, но знаеме дека тоа е нашата болна реалност, напиша Комператоре Шафер.
