Министерството за транспорт и врски има идејни решенија и физибилити студија за хотел Градска куќа, Мал ринг и ГТЦ во Скопје, на што се потрошени околу 200.000 евра, но не е обезбедена документација, ниту, пак, има сознанија дали истите се применети за реализација на проекти. Ова го констатираа државните ревизори во објавените ревизорски извештаи за ова Министерството. Ревизорите, меѓудругото, утврдиле и дека Министерството има изградено, патишта, улици, водоводи и канализации, потоа изработени проекти за плажи, туристички зони и други објекти кои со години се во употреба во Охрид, Преспа и Дојран, но не е извршено примопредавање на општините.
„Одговорното лице на МТВ да преземе мерки и активности за да се изврши примопредавање на целокупната документација – по градби на општините и воведување во деловните книги на општините“, е препораката на ДЗР.
Како најголеми системски слабости во работата на МТВ, ревизорите констатирале дека, иако Владата ги субвенционирала Железници Транспорт за превоз на патници, за враќање на долгови кон добавувачи и плати за вработени за 2022 година, ова акционерско друштво прикажало најголеми трошоци, а има и помалку издвоени средства од предвиденото законско право за железничка инфраструктура.
„Ревизијата обрнува внимание на неопходноста да се направат детални анализи и проценка за утврдување на причините за состојбите – зголемување на трошоците во патниот сообраќај и целокупното работење на Железници Транспорт, со цел преземање мерки и донесување на организациски и финансиски и други одлуки за истите“, пишува во извештајот на ДЗР.
И покрај ова, ревизорите утврдиле дека финансиските извештаи се прикажани вистинито и објективно, во сите материјални аспекти заклучно со 31 декември 2022 година.
Емилија Мисирлиевски