Охридската полиција спасувала турист од водите на Охридското езеро откако се слизнал од карпа и паднал во езерото.
Станува збор за англиски турист на 45-годишна возраст кого полицијата го спасила и со туристички чамец го префрлила во болницата „Свети Еразмо“. Имал телесни повреди.
Инцидентот се случил на брегот на езерото каде се наоѓаат хотелските комплекси во правец кон Пештании Трпејца.
Во продолжение соопштението на МВР:
Денеска (27.06.2024) во 12.35 часот во СВР Охрид е пријавено дека, од карпа, во водите на Охридското езеро, во близина на хотелски комплекс на охридското крајбрежје, паднало едно лице, кое се здобило со повреди. На посоченото место веднаш биле упатени полициски службеници од Полициската станица Охрид, како и од Полициската станица за граничен надзор „Охридско езеро“. По преземените мерки, лицето е извадено и констатирано е дека се работи за С.М.А.(45) од Англија. Лекар од Итната медицинска помош, кај него констатирал телесни повреди, по што, со пловен објект на Полициската станица за граничен надзор е транспортиран до Езерската полиција. Оттука, повредениот, со медицинско возило е пренесен до болницата „Св.Еразмо“ во Охрид.