Не верувам дека политичарите во овој момент ќе се откажат од привилегии во име на борбата против корупција и доброто владеење, меѓутоа доколку сакаат да обезбедат една независност и стручност на тие служби, тие би требале да се откажат од политички назначувања на раководни функции, со цел да се дозволи најдобрите луѓе во државата да дојдат на позициите со кои треба да раководат, рече Благоја Пандовски, претседател на Транспаренси Интернешнл Македонија, во вечерашната „Топ тема“ на ТВ Телма.
„Тука меритократијата, пред сè, треба да ја заземе главната улога, односно да се измери нивното постигнато, нивното образование, нивните квалификации и на еден поопшт избор, со јавни огласи, да се назначат тие места. На тој начин, не само што ќе се обезбеди стручност на тие раководни позиции, туку ќе се избегне и клиентелизмот кој тие назначени позиционери, да ги наречеме, го имаат кон оние кои ги назначиле“, смета Пандовски.