Нови три случаи на голема кашлица регистрира Центарот за јавно здравје (ЦЈЗ) Скопје. И овој пат тоа се општините Аеродром, Карпош и Сарај. Само еден од потврдените случаи е целосно вакциниран, другите два се делумно вакцинирани и 11-месечно бебе кое е невакцинирано.
На утрешниот состанок на Комисијата за заразни болести се поизвесно е дека ќе бидат донесени нови мерки, имајќи ја предвид актуелната состојба со пертусис во Скопје, но и можноста големата кашлица да се рашири и во останатите градови во земјава. Доенчето од Куманово со потврдена голема кашлица е невакцинирано, хоспитализирано на Универзитетската клиника за детски болести е со стабилна клиничка слика, во меѓувреме е информиран и ЦЈЗ Куманово.
„Клиничката слика на детето е добра и во моментот на прием е со стабилна клиничка состојба, но со симптоми кои укажуваат и индицираат потреба од дополнителни иследувања. И денес клиничката слика е добра. Секоја нова инфекција се документира и за тоа најпрво се известува Институтот за јавно здравје. Тие ја имаат информацијата во истиот момент, а утрово се испратени и писмени пријави до Институт за јавно здравје во Скопје и пријава до Центарот за јавно здравје во Куманово“, изјави проф. д-р Светлана Кочева од Универзитетската клиника за детски болести.
На Универзитетската клиника за инфективни болести минатата недела е прегледан само еден пациент со пертусис, потврден во Институтот за јавно здравје, со стабилна клиничка слика и пуштен на домашно лекување. Станува збор за 29-годишен маж, со сите редовно примени вакцини.
Во упатството кое го изработи Институтот за јавно здравје за следење на голема кашлица и постапување при појава на епидемија кое е доставено до Министерството за здравство и центрите за јавно здравје во однос на изолација е забележано:
„Невакцинирани/нецелосно вакцинирани блиски контакти на возраст под 7 години треба да се исклучат од градинка, училиште и јавни собири во тек на 21 ден од последниот контакт со заболено лице доколку не земаат антибиотик или најмалку 5 дена од почеток на земање на антибиотикот (доколку примаат хемиопрофилакса)“, соопштија од Институтот за јавно здравје.
Градинките и Министерството за труд и социјална политика чекаат дополнително усогласување на насоките и заклучоците на Комисијата и на Министерството за здравство за да дејствуваат и да не примаат децата кои се невакцинирани и делумно вакцинирани.
Лицата со блага форма на болеста кои не знаат дека имаат голема кашлица, се заразни од појавата на првите симптоми. Заболените се најзаразни до околу 3 недели по почетокот на кашлицата.
Нина Стефанова