Изневерените очекувања, а не етничката припадност, се причината зошто на чело на техничката влада не треба да застане актуелниот спикер Талат Џафери, смета претседателот на новата партија ЗНАМ, Максим Димитриевски.Носителите на функции, вели, треба да и` се лојални на државата и да се водат од желбите на граѓаните и законот, а не од партиските принципи.
Димитриевски смета дека се потребни суштински промени и во Државната изборна комисија. Потсетува дека, актуелниот закон не им нуди можност на помалите партии да имаат соодветно и еднакво учество во изборниот процес. Поразително е, вели, дека конечните одлуки за многу процеси, па и за составот на ДИК, се носат на лидерски средби.
Неговата партија ќе учествува самостојно на изборите, а ќе имаат и свој претседателски кандидат. За Димитриевски, соработката со СДСМ е завршена работа, а нема намера да соработува ниту со ВМРО ДПМНЕ. Политички ќе бидат позиционирани во центарот, а во делот на социјалната политика ќе се движат кон лево. Наскоро ќе бидат формирани ограноци во сите општини, а доцнењето се должи на опструкциите со кои се соочиле поради употребата на името Македонија при регистрацијата на партијата. Сепак, судот на крај пресудил во нивна корист.
Далиборка Демјанска Цветановска
