Општина Куманово поднесе кривична пријава за музејот во Сопот. Пријавата е против организирана група непознати лица поради основано сомнение за сторено кривично дело „узурпација на недвижности“ и кривично дело „бесправно градење“.
Од општината информираат дека организираната група, во подолг временски период заклучно со 6 ноември годинава, ги сториле наведените кривични дела со узурпација и градба на градежна парцела, државно земјоделско земјиште во Сопот, и на истата, покрај узурпација, изградиле објект со функција музеј – меморијален центар.
Кривичната пријава, заедно со сите обезбедени наводи и докази со кои општината располага, е поднесена до основно јавно обвинителство за гонење на организиран криминал и корупција, основно јавно обвинителство Куманово и МВР – СВР Куманово, за нивно понатамошно поставување.
На почетокот на ноември, претседателот на ДУИ, Али Ахмети отвори меморијален комплекс во кумановското село Сопот. Таму беше изложена и карта на Голема Албанија. Претходно, премиерот Ковачевски рече дека музејот е на приватен имот и ја нарече нерелевантна. Додека, лидерот на ВМРО-ДПМНЕ, Христијан Мицкоски кажа дека станува збор за шовинистички пораки што треба да се осудат.
