Дводневната борба со огнот не остави ништо од магацинот, во близина на тетовско Фалише. Сѐ што имало внатре е пеплосано. Пожарникарите уште вчера успешно го локализираа пожарот, но ништо од магацинот не можеше да се спаси.
Поголемиот дел било железарија, а мал дел за бои, лакови и други хемиски препарати. Во огнот изгореа 14 тони бои и лакови и други хемиски средства, велат официјалните информации на Центарот за управување со кризи.
„Според информациите коишто ги добив од газдите ова е железарија. Ама во железариите обично продаваат и бојлери, плински боци, пластика, бои и лакови. Тоа сигурно имало внатре. Вчера имавме и експлозии. Јасно е тоа дека боците можат да пукаат внатрешно и како што можете да видите и самите, ѕидовите пукнале од детонациите“ вели Авни Ахмети, командир на ТППЕ-Тетово.
Отровните честички се испуштени во атмосферата и веќе се присутни во воздухот. Загадени се и почвата и водите, вели министерката за животна средина, Каја Шукова.
Апелираше до жителите во околината да внимаваат и барем неколку дена да не јадат од земјоделските производи од околните ниви.
„Евидентно е дека ќе има загадување на воздухот. За жал ние не можеме да го измериме истото бидејќи е од органски испарливи материи. Јас уште вчера бев во комуникација со директорот на Центарот за управување со кризи и со министерот за здравство и дадовме препорака граѓаните да не излегуваат без потреба, а вратите и прозорците на домовите да бидат затворени. Сепак станува збор за поголем распон и не е ова само за околу објектот туку загадувањето преку воздухот се шири и на стотици метри. Нашата препорака до граѓаните е да внимаваат овие неколку дена, а надлежните институции тоа што може да го направат и да го евидентираат секако дека ќе ја информираат јавноста, вели министерката за животна средина и просторно планирање, Каја Шукова.
Во близина е малото населено место Фалише, со помалку од илјада жители. За нив најмногу важат препораките од властите.
Професорите алармираат дека овој случај дополнително ќе го засили аерозагадувањето во Тетово. Овој град е еден од оние кои често се на листата на најзагадени европски и светски градови. Но, тетовчани поделени во ставовите го коментираат проблемот.
„Не смрди. Убаво е ете, Шар Планина е близу“ вели жител на Тетово.
„Воздухот е загаден и со и без пожарот. Ние секако дишиме тежок воздух овде“ додава друг негов сограѓанин.
Професорот од Институтот за хемија, Јане Богданов, во телефонска изјава за Телма вели – треба да се дознае идентитетот на хемикалиите и од соодветни безбедносни листи да се направи проценка на ризикот и да се преземат мерки за заштита.
„Тука најверојатно станува збор за органски растворувачи, некои полимери во зависност од препаратот. Тоа што гори најверојатно е од растворувачи. Ако се органски растворувачи, не би се очекувало да има штетни материи ако е потполно согорувањето. Повеќе би се очекувало да има од пластиките и тие другите адитиви. Треба да се преземат соодветни мерки за заштита на противпожарните екипи и исто така и на локалното население, ако се тука во близина“ вели д-р Јане Богданов од Институт за хемија при ПМФ – УКИМ.
Ова не е првпат да гори ваков тип на објект во Тетово. Увидните екипи чекаа целосно да биде изгаснат пожарот за да почнат да собираат докази за вештачење и да се откријат точните причини, но и околностите во кои избувна огнот.
Неофицијално, во случајов станува збор за проблеми со електричното напојување.
Петар Догов