Од 83 лица кои се вратија во Шведска од територијата контролирана од Исламската држава, 21 сега работат со деца, млади и ранливи, објави шведскиот весник Експресен.
Според истражувањето на весникот, тие биле вработени во центри за одмор, предучилишни установи и социјални служби, пренесува Еурактив.
Според извештаите, и покрај предупредувањата од безбедносните служби дека поранешните џихадисти можат да придонесат за радикализација и регрутирање во Шведска, вкупно 24 поранешни борци на ИСИС нашле работа во јавните служби.
Шведската министерка за либерално образование, Лота Едхолм изјави дека политиката на Шведска за враќање и контрола на поранешните шведски исламистички борци е „наивна“.
- „Целосно е неприфатливо луѓето кои се терористи на ИСИС да работат во шведски училишта, забавни центри и слично. Тоа не треба да се дозволи“, рече таа.
Весникот, исто така, го наведува случајот на поранешен џихадист на почетокот од оваа година, кој беше осуден според таканаречениот закон за патување, кој им забранува на луѓето да патуваат на територии под контрола на ИСИС, но три месеци по отслужувањето на казната тој нашол работа како замена за младински работник во Гетеборг, бидејќи конкретното дело не било запишано во неговата криминална евиденција.
- „Училишниот систем мора да разбере дека денес сме во поинаква ситуација. Мора да добивате соодветни препораки кога вработувате луѓе, дури и за луѓе кои можат да бидат ангажирани само на замена за работа“, рече Едхолм.