Министерството за здравство (МЗ) и министерот Фатмир Меџити со поддршка за истражувачкото новинарство, слободата на говорот и јавното мислење, бидејќи, како што се нагласува во соопштението од институцијата, тоа е одлика на секое слободно и демократско општество, какво што е и нашето. Притоа додаваат дека во целост соработувале и ќе соработуваат со сите институции во врска со судските постапки во врска со пожарот во модуларната болница во Тетово.
Во тој контекст, МЗ во целост ги демантира и ги отфрла како невистина наводите кои се шират на социјалните мрежи дека од страна на министерството има исплатено пари за модуларните објекти на Здравствен дом Скопје.
„Ова е апсолутна невистина. Министерот Меџити со стапување на функцијата во МЗ се заложи за откочување на сите постапки, процедури и проекти, кои една година беа заглавени од претходното раководство на МЗ. Една од постапките беше и изградбата на скопските модуларни амбуланти. Една година претходното раководство на МЗ не дало никаков одговор на компанијата која ги правеше објектите, во врска со таа постапка, како би се избегнале судски постапки за кои отштета би се платила од буџетот, односно од парите на граѓаните. МЗ изготви информација до Влада од каде се чека одговор од неколку институции дали МЗ треба да ги исплати трите направени амбуланти, од планираните 10 со што би се избегнало плаќање на затезни камати и отштета. Оваа постапка се уште не е завршена и од страна на МЗ самоиницијативно нема исплатено ниту денар за модуларните објекти. МЗ работи согласно законот и пред се ги штити граѓаните и нивните права“, стои во соопштението на министерството за здравство.