Албанскиот премиер Еди Рама денеска порача дека, доколку Србија не ги ослободи тројцата неодамна уапсени косовски полицајци, тоа би можело да доведе до формирање на „република КФОР“ на северот на Косово.
Рама на Твитер напиша дека, во случај да не дојде до смирување на ситуацијата, голем губитник ќе биде Приштина.
„Се плашам дека колку повеќе Курти инсистира да биде сам против сојузниците, ситуацијата ќе се влошува, враќајќи го КФОР на чело. А, потоа збогум на периодот од кој знае каква формална контрола на државата над целата територија и тогаш ќе уживаме во „република КФОР“ на северот на Косово. Албине, излези од самоизолација, немој да го загубиш северот, така што насекаде гледаш непријатели и предавници. Времето брзо минува“, додаде Рама.