Три автобуси и едно комбе рано утринава беа во пламен на плац на транспортна фирма во кочанската населба Оризари. Големиот пожар се случи непосредна близина на бензинска пумпа, а брзата интервенција на кочанските пожарникари спречила пламените јазици да не се рашират. Нема официјални информации, дали пожарот е подметнат и како се запалиле автобусите.
„Пожарот се случи во 02.30 часот, во СВР Штип е пријавено дека кај бензинска пумпа во населба Оризари, кочанско се опожарени три автобуси и едно комбе, сопственост на приватна фирма. Пожарот е изгаснат од страна на Територијалната противпожарна единица Кочани. Повредени лица нема“ информираат од СВР-Штип.
Автобусите се целосно изгорени, останата им е само металната конструкција, утринава од нив се уште излегуваше чад. По извршениот увид ќе се знаат и причините за пожарот, како и колкава е материјалната штета.
Викторија Димитрова Јованова
