Шефот на иранската дипломатија, Абас Аракчи, му порача на американскиот претседател Доналд Трамп дека доколку е искрен во својата намера да постигне нуклеарен договор со Иран, мора да престане со својот „непочитувачки и неприфатлив тон“ кон врховниот лидер на Иран, ајатолахот Али Хамнеи.
Во објава на мрежата X утрово, Аракчи нагласи дека Трамп треба да престане „да ги повредува милионите свои искрени следбеници“ за да го отвори патот за можен договор, јавија британските медиуми.
Хамнеи пред два дена, во првата своја реакција по 12-дневната војна, објави дека Иран го добил конфликтот со Израел и му честиташе на иранскиот народ за победата.
Потоа Трамп го повика врховниот лидер на Иран да „ја каже вистината“ откако Хамнеи прогласи победа над Израел и САД.
„Видете, вие сте човек со голема вера, човек кој е многу почитуван во оваа земја. Мора да ја кажете вистината. Вие бевте претепани до крај, а и Израел беше претепан. Двете земји беа претепани и беше вистинско време да се стави крај на тоа“, рече Трамп во тоа време.