Партиите почнаа да ги откриваат кандидатите за градоначалници и да кројат предизборни стратегии. Политичката битка доби и нов фронт на локално ниво. Во вечерашната Топ Тема дебатираат политичките аналитичари Ибрахим Мехмети и Петар Арсовски.
Според Арсовски идејата за една изборна единица не е нова туку таа беше и дел од работната група на ОДИХР, но немало епилог од тоа, а нејзината реализација најмногу ќе зависи од политичката волја.
„Овие измени на Изборниот законик најмногу се однесуваат на парламентарните избори, со исклучок на предлогот на Демократскиот сојуз за пилот општини и за отворени листи во некои од општините.“
„Ѓаволот е во деталите“ потенцира Арсовски, кој смета дека изборниот праг од 3 отсто од излезените избирачи или 5 отсто, може да значи изборен праг од 50 илјади гласа. Тој праг не може да го постигне ни една од овие партии кои се иницијатори на предлогот. Нискиот изборен праг може да донесе премногу фрагментирано собрание кое ќе исфорсира постизборни коалиции и може да направи посериозни политички импликации по изборите, а со високиот изборен праг да се исклучат партии кои не би требало да бидат исклучени.
