Предлогот за нов гувернер ќе биде пратен до пратениците во понеделник, а ќе се избира во вторник. Во игра се неколку имиња. Премиерот Мицкоски не откри кој е негов фаворит. Кусо одговори дека услов за да биде поддржан од неговата партија во собранието е да продолжи да го брани фиксниот курс на денарот.
„Не е важно кој е мој фаворит лично. Она што можам да го кажам како претседател на Владата е дека сите кандидати кои се разгледуваат се вонсериски искусни и кандидати кои сум сигурен дека ќе ја одржат макроекономската стабилност“, вели премиерот Христијан Мицкоски.
Во меѓувреме во јавноста се споменуваат неколку имиња како можни кандидати за оваа функција. Меѓу нив се поранешните министри за финансии Зоран Ставрески, Трајко Славески, актуелен претседавач во Советот на Град Скопје, кој за Телма кажа дека досега никој не го консултирал, а доколку го консултираат ќе размисли. Се споменува и актуелната гувернерка Анита Ангеловска Бежоска и Маја Кадиевска Војновиќ, која е член на надзорен одбор на КИБС. Таа на прашањето на Телма дали има амбиција за оваа функција и дали ја консултирале не сакаше да коментира.
Економистите и банкарите, пак, очекуваат новиот гувернер да го продолжи процесот на унапредување на системот
Инаку, мандатот на актуелната гувернерка завршува на 21 мај. Беше избрана во 2018 година со поддршка од сите пратеници. Ангеловска Бежоска дојде на местото на нејзиниот претходник Димитар Богов кој беше избран за гувернер со 62 гласа на тогаш владејачката ВМРО-ДПМНЕ, а предлогот од тогашниот претседател Ѓорѓе Иванов да добие и втор мандат, го одби по бурните реакции во јавноста, по што Бежоска стана прва жена гувернер, избрана со двотретинско мнозинство. Мандатот на гувернерот е седум години.
Народната банка ја спроведува монетарната политика, се грижи за стабилноста на инфлацијата и курсот на денарот.
Ирена Чачкова